Presidenti Donald Trump tha të martën se një tjetër sulm ndaj anijeve që dyshohet se transportonin drogë nga Venezuela drejt Shteteve të Bashkuara kishte vrarë gjashtë "narkoterroristë". Të paktën 27 persona janë vrarë deri më tani në sulme të tilla, përfshirë këtë të fundit, të cilin administrata e quan të nevojshëm për të mbrojtur Shtetet e Bashkuara nga kontrabanda e narkotikëve. Por shumë ekspertë vënë në pikëpyetje ligjshmërinë e përdorimit të forcës vdekjeprurëse në ujëra të huaja ose ndërkombëtare kundër të dyshuarve që nuk janë kapur ose marrë në pyetje. Sulmi i fundit u krye në ujëra ndërkombëtare, tha Trump, duke shtuar se "anija po trafikonte drogë, ishte e lidhur me rrjete të paligjshme narkoterroriste dhe po kalonte tranzit përgjatë një rruge të njohur DTO (organizatë e përcaktuar terroriste)". Shtetet e Bashkuara kanë vendosur gjithashtu anije luftarake në Karaibe pranë Venezuelës dhe kanë përdorur aeroplanë për të shkatërruar disa motoskafe që nga sulmi i parë më 2 shtator. Këto lëvizje kanë rritur tensionet me Presidentin Venezuelan Nicolas Maduro, i cili ka njoftuar ushtrime ushtarake, e ka vënë vendin e tij në gatishmëri dhe tha se vendosja detare e SHBA-së është projektuar për ta rrëzuar atë. Trump ka thënë se politika e tij kundër drogës po funksionon dhe se veprimi ushtarak mund të zgjerohet në rrugë tokësore.