Të tjera detaje janë zbuluar mbi plagosjen e 32-vjeçares në Durrës, nënë e dy fëmijëve, e cila u sulmua me thikë nga ish-bashkëshorti I saj. Fqinja e të plagosurës, e cila ishte dhe ajo që I dha ndihmën e parë tregoi se 32-vjeçarja jetonte me qeranë katin e dytë të një godine 3 katëshe në lagjen 16. Sipas dëshmisë gjithçka nisi rreth orës 3:00 të mëngjesit, kur nëpër shkallë u dëgjua një zë i mbytur që kërkonte ndihmë me dëshpërim. "Dëgjova një zë të thellë që thoshte "Ndihmë, ndihmë!". Dola te dera dhe ajo më tha: "Ndihmë se më kanë çarë me thikë". Nuk po e njihja dot në fillim, ishte e larë në gjak e tëra", rrëfeu fqinja e tronditur ndërsa tregoi se e plagosura kishte arritur të zbriste e vetme deri në katin e parë. Fqinja tha se menjëherë u njoftua ambulance e policia. Sipas saj, gruaja jetonte e vetem dhe nuk shoqërohej me persona të tjerë. Në lagje ajo njihej si një grua e qetë që shkonte çdo ditë në punë, ndërsa fëmijët jetonin te njerëzit e saj. Fqinja theksoi se në atë shtëpi nuk kishte parë asnjëherë të futej ndonjë mashkull apo ish-bashkëshorti i saj, të cilin nuk e njihte.