Një 57-vjeçar është arrestuar nga Policia e Lushnjës, pasi dyshohet se një ditë më parë nga vënia flakë e mbeturinave në pronën e tij, zjarri u përhap dhe shkaktoi dëme të konsiderueshme në tokën e fqinjit. Nga zjarri janë shkaktuar dëme në tokën bujqësore të fqinjit, janë djegur një mjet bujqësor, një rimorkio dhe baza ushqimore për blegtorinë. Ndërkohë, në përpjekje për të shuar flakët, i zoti i pronës, fqinji i 57-vjeçarit ka pësuar djegie. Ai është transportuar në Spitalin e Lushnjes për të marrë ndihmë mjekësore dhe fatmirësisht ndodhet jashtë rrezikut për jetën. Materialet procedurale iu referuan Prokurorisë Fier, për veprën penale "Shkatërrimi i pronës me zjarr", ndërkohë që Drejtoria Vendore e Policisë Fier ka bërë thirrje për të gjithë qytetarët që, në asnjë rast, të mos ndezin zjarre në këto temperatura të larta, pasi për ta do të ketë përballje me procedurat ligjore.