Masat ndëshkuese të Bashkimit Europian kanë dëmtuar Kosovën, që përllogaritet se ka humbur gati 150 milionë euro asistencë nga Brukseli përgjatë viteve 2023 dhe 2024. Vlerësimi është bërë nga agjencia e lajmeve Reuters, që dy ditë para zgjedhjeve parlamentare që mbahen këtë të diel i ka kushtuar një analizë situatës ekonomike dhe politike në vend. Agjencia thotë se Bashkimi Europian nuk ka një listë konkrete me projektet që cenohet nga masat e pezullimit të financimit, por duke cituar dy burime, përfshirë një diplomat të lartë, flet për dhjetra projekte që arrijnë vlerën e të paktën 150 milionë euro që kanë ngecur pas vendosjes së masave. Reuters citon debatet e brendshme mes vendeve anëtare të BE-së, ku një pjesë e tyre kërkojnë heqjen e këtyre masave, me arsyetimin se ato nuk kanë ndryshuar kursin e politikës së Albin Kurtit dhe se më shumë po dëmtojnë qytetarët e Kosovës.