Një tërmet i fortë me magnitudë 6.2 goditi Stambollin të mërkurën, tha agjencia turke e fatkeqësive natyrore AFAD, një nga tërmetet më të fortë që ka goditur qytetin prej 16 milionë banorësh në vitet e fundit. Nuk pati raportime të menjëhershme për dëme, por njerëzit dolën në panik nga ndërtesat pasi tërmeti tronditi qytetin e vendosur në brigjet evropiane dhe aziatike të ngushticës së Bosforit. Shumë njerëz u mblodhën në parqe dhe të tjerë u ulën në pragjet e dyerve, ose qëndruan jashtë shtëpive të tyre në qendër të Stambollit, ndërsa pasgoditjet vazhduan. Disa dyqane u mbyllën pas tërmetit që goditi në anën evropiane të qytetit. Epiqendra e tërmetit, i cili u regjistrua në orën 12:49 minuta, ishte në zonën e Silivrit, rreth 80 km në perëndim të Stambollit ndërsa thellësia ishte 6.92 km. Ministri turk i Transportit Abdulkadir Uraloglu tha se inspektimet fillestare nuk zbuluan ndonjë dëmtim në autostrada, aeroporte, trena apo metro.