Shtëpia e Bardhë ka njoftuar se presidenti amerikan Donald Trump, do të marrë një vendim brenda dy javëve të ardhshme nëse Shtetet e Bashkuara do të përfshihen apo jo në luftën mes Izraelit dhe Iranit. Zëdhënësja e Shtëpisë së Bardhë, Karoline Leavitt, gjatë një konference për shtyp tha se Trumpi është i interesuar për një zgjidhje diplomatike me Iranin, por përparësia e tij kryesore është të garantojë që Irani të mos ketë mundësi të zhvillojë ndonjë armë bërthamore. Leavitt tha se marrëveshja do të duhej ta ndalonte pasurimin e uraniumit nga ana e Teheranit dhe t’i zhbënte aftësitë e Iranit për të prodhuar ndonjë armë bërthamore. “Presidenti është gjithmonë i interesuar për zgjidhje diplomatike... Ai është presidenti i paqes përmes forcës. Dhe, nëse ka mundësi për diplomaci, presidenti gjithmonë do ta shfrytëzojë atë. Por, gjithashtu dua të shtoj se ai nuk ka frikë ta përdorë forcën”, tha Leavitt. Zëdhënësja e Shtëpisë së Bardhë nuk pranoi të deklaronte nëse Trump do të kërkonte autorizimin e Kongresit për ndonjë sulm ndaj Iranit. Leavitt deklaroi se Uashingtoni është I bindur se Irani ka qenë më afër se kurrë sigurimit të një arme bërthamore. Prej ditësh, Izraeli i bombardoi ndërtesat bërthamore në Iran. Lufta ajrore njëjavore mes dy vendeve armike të Lindjes së Mesme u përshkallëzua edhe të enjten dhe asnjëra palë nuk tregoi shenja frenimi.