Sekretari amerikan i Mbrojtjes Pete Hegseth ndau detaje të një sulmi të kryer në mars ndaj rebelëve Houthi të Jemenit, në një grup mesazhesh që përfshinte gruan, vëllain dhe avokatin e tij personal, i tha agjencisë së lajmeve Reuters të dielën një burim i njohur me çështjen. Zbulimi i një bisede të dytë në Signal, ngre më shumë pikëpyetje në lidhje me përdorimin nga Hegseth të një sistemi mesazhesh të paklasifikuara për të ndarë detaje shumë të ndjeshme sigurie. E ky është një moment vecanërisht delikat për sekretarin e mbrojtjes pasi zyrtarë të lartë u dëbuan nga pentagoni javën e kaluar në kuadër të një hetimi të brendshëm për rrjedhjen e informacionit. Në këtë rrjedhje të dytë, Hegseth ndau detaje të ngjashme të sulmit, me ato të zbuluara muajin e kaluar nga revista The Atlantic pasi kryeredaktori i saj, Jeffrey Goldberg, u përfshi gabimisht në një grup të veçantë chati në aplikacionin Signal, në një incident të sikletshëm që përfshin të gjithë zyrtarët më të lartë të sigurisë kombëtare të Presidentit Donald Trump.