Top News – Ndalohet kondicioneri nën 27 gradë / Spanja po kursen: Në dimër jo më shumë se 19 gradë

Spanja ka vendosur kufizime të ashpra për ajrin e kondicionuar në ndërtesa publike me qëllim kursimin e energjisë në mesin e valës së dytë të të nxehtit në vend. Me temperaturat që do të kapërcejnë 38 gradët celcius, sipas një dekreti të ri të qeverisë, ajri i kondicionuar nuk duhet të zbresë nën 27 gradë celcius. Rregullat prekin transportin publik, dyqanet, zyrat, teatrot dhe kinematë dhe vjen si pjesë e një përpjekjeje mbarë evropiane për të reduktuar varësinë nga energjia rus. Dekreti prek edhe ngrohjen në stinën e dimrit kur temperaturat nuk duhet të shkojnë në mbi 19 gradë celcius. Plani ka si qëllim të kursejë gaz për dimrin në rast se vladimir Putin vendos të mbyllë rubinetat për evropën si rezultat i sanksioneve. E në një skenar të tillë, pa kursime gjatë verës, dimri do të ishte shumë i vështirë. Miratuar javën e shkuar, dekreti po ashtu kërkon që nga ora 22 e mbrëmjes dyqanet të fikin dritat në vitrina, një detyrim ky që prek edhe ndricimin e ndërtesave publike.