Nga e hëna policia do të nisë operacionin për ndalimin e përkohshëm të monopatinave elektrike, të cilat tanimë konsiderohen si rrezik dhe burim aksidentesh. Lajmin e kanë dhënë ministrja e Brendshme Albana Koçiu dhe drejtori i policisë së shtetit Ilir Proda. “I kam kërkuar Policisë së Shtetit, të pezullohet përkohësisht lëvizja e monopatinave elektrike. Do të hartojmë rregulla të qarta për të gjithë, do qartësojmë korsitë, rrugët apo hapësirat ku monopatinat elektrike mund të përdoren, kriteret e moshës së përdorimit, po ashtu masat mbrojtëse, ndriçimin dhe shpejtësinë e lejuar” Drejtori i Policisë së shtetit ka kërkuar mirëkuptimin e qytetarëve duke sqaruar se janë marrë shumë ankesa nga qytetarët rreth rrezikut që monopatinat përfaqësojnë, sidomos për të miturit dhe të moshuarit që lëvizin në rrugë, por edhe për vetë përdoruesit.