Presidenti kinez Xi Jinping pritet t'i bëjë presion presidentit amerikan Donald Trump që të ndalojë shitjen e armëve për Tajvanin, bazuar në një deklaratë të përbashkët të vitit 1982, gjatë vizitës së tij në Uashington këtë javë; një kërkesë që ai mund ta parashtrojë gjatë vizitës në Arkivin Kombëtar të SHBA-së, sipas burimeve të njohura me çështjen. Kina e konsideron çështjen e Tajvanit, të cilin Pekini e sheh si territor të vetin, si çështjen e saj më të ndjeshme dhe më të rëndësishme diplomatike, dhe ka kërkuar vazhdimisht ndalimin e shitjes së armëve. SHBA-ja është e detyruar me ligj t'i sigurojë Tajvanit, i cili qeveriset në mënyrë demokratike, mjetet për t'u mbrojtur, pavarësisht mungesës së marrëdhënieve zyrtare diplomatike. Qeveria e Tajvanit i hedh poshtë pretendimet e Pekinit për sovranitet. Tre burime të njohura me diskutimet midis SHBA-së dhe Kinës, përpara vizitës së Xi Jinping në Uashington këtë javë për një samit me Trumpin, i thanë agjencisë Reuters se Kina ka gjasa të parashtrojë interpretimin e saj lidhur me një nga tre "deklaratat e përbashkëta" midis dy vendeve, të nënshkruara në vitin 1982. Në atë dokument, SHBA deklaron se synon të reduktojë gradualisht shitjen e armëve për Tajvanin dhe se nuk kërkon shitje afatgjata të armëve për Taipein. Megjithatë, në një memorandum shoqërues, presidenti i atëhershëm amerikan Ronald Reagan deklaroi se gatishmëria e SHBA-së për të reduktuar shitjen e armëve ishte "e kushtëzuar absolutisht nga angazhimi i vazhdueshëm i Kinës për zgjidhjen paqësore" të mosmarrëveshjeve me Tajvanin.