Avokati i Popullit, Endrit Shabani ka kontaktuar me homologun izraelit, Matanyahu Englman për të kërkuar garanci të plota për të drejtat, integritetin fizik dhe trajtimin e shtetasit shqiptar Baki Goxhaj, të ndaluar nga autoritetet izraelite gjatë ndërhyrjes ndaj nismës humanitare të flotiljes Sumud. ‘Kam besim që Kontrollori i Shtetit i Izraelit do të angazhohet me përgjegjshmëri për të garantuar një trajtim dinjitoz të Goxhajt, në përputhje me standardet ndërkombëtare të të drejtave të njeriut.’-është shprehur Shabani. Përtej rrugëve që po ndiqen nga shteti shqiptar, Institucioni i Avokatit të Popullit ka deklaruar se do të jenë të palëkundur në mbrojtje të aktivistit Goxhaj derisa siguria, të drejtat dhe kthimi i tij në Shqipëri të garantohen plotësisht. Avokati i Popullit, Endrit Shabani po e ndjek çështjen edhe në cilësinë e Presidentit të Organizatës së Avokatëve të Popullit të Mesdheut. Pamjet e aktivistëve të flotiljes humanitare “Sumud”, mes tyre edhe të Baki Goxhajt duke u keqtrajtuar nga autoritetet izraelite u publikuan nga ministri izraelit Itamar Ben-Gvir. Flotilja Sumud ishte në një mision për të dërguar ndihma humanitare në Gaza duke sfiduar bllokadën detare të Izraelit e vendosur që prej vitit 2007.