Presidenti i SHBA-së, Donald Trump, tha të martën se Shtetet e Bashkuara do të fillojnë të vendosin tarifa dhe të marrin masa të tjera ndaj Rusisë brenda 10 ditësh nëse Moska nuk sinjalizon përparim drejt përfundimit të luftës së saj më shumë se trevjeçare në Ukrainë. Trump njoftoi për herë të parë të hënën se po shkurtonte afatin fillestar 50-ditor që vendosi një muaj më parë për veprim nga Moska dhe përmendi një afat të ri prej 10 deri në 12 ditësh. Të martën, ai u tha gazetarëve se nuk kishte marrë një përgjigje nga Rusia. Duke folur në bordin e Air Force One, Trump tha se nuk ishte i shqetësuar për ndikimin e mundshëm të sanksioneve ruse në tregun ose çmimet e naftës, duke u zotuar të rrisë prodhimin vendas të naftës për të kompensuar çdo ndikim. "Nuk e di nëse do të ndikojë në Rusi e ndoshta Putin do të vazhdojë luftën," tha Trump. "Por ne do të vendosim tarifa dhe do të marrim masa të tjera për t’i detyruar të marrin një vendim". Presidenti Trump, i cili në të kaluarën ka folur për një marrëdhënie të mirë me Putinin, është frustruar gjithnjë e më shumë me refuzimin e Moskës për të rënë dakord për një armëpushim. Afati i ri sugjeron se Trump është i përgatitur të ecë përpara me kërcënimin e tij për sanksione, pasi më herët kishte hezituar ta bënte këtë.