Papa Françesku është ndarë nga jeta në moshën 88-vjeçare, ka njoftuar Vatikani. Ati i Shenjtë, i cili ishte peshkop i Romës dhe kreu i Kishës Katolike, u bë Papë në vitin 2013 pasi paraardhësi i tij Benedikti XVI dha dorëheqjen. Vitet e fundit, papati i tij u shënua nga disa hyrje e dalje në spital dhe shqetësime për shëndetin e tij. Më 14 shkurt, Papa u shtrua në spital për trajtimin e bronkitit. Në ditët në vijim, Vatikani tha se ai ishte diagnostikuar me pneumoni të dyfishtë dhe se ai kishte bërë transfuzion gjaku pasi analizat zbuluan se kishte nivele të ulëta të trombociteve, cka shoqërohet me anemi. Më 22 shkurt, Selia e shenjtë tha se Papa ishte në një gjendje kritike pas një "krize të frymëmarrjes". Ai qëndroi në spital për pjesën tjetër të muajit, me mjekët që thanë se gjendja e tij mbetej “komplekse”.