Gjenerali më I lartë i Aleancës së Atlantikut të Veriut, NATO, Christopher Cavoli, ka vlerësuar strategjinë e zgjedhur nga Ukraina në përballje me forcat ruse, edhe pse përparimi është I ngadaltë. “Ukrainasit sapo kanë qenë të fokusuar në mbrojtjen në lindje, duke ia mohuar Rusisë përdorimin e Krimesë dhe Ukrainës jugore për të sulmuar pjesën tjetër të Ukrainës, duke ruajtur aksesin e tyre në Detin e Zi”, tha gjenerali amerikan. Ai e ka konsideruar strategjinë si të shkëlqyer. “Mendoj se ata kanë një strategji të shkëlqyer. Pjesa kryesore është ndërtimi i forcave”, shtoi Cavoli në një fjalim të enjten në Konferencën Amerikane të Sigurisë dhe Politikës së Jashtme. Për të fituar, një vend duhet të jetë në gjendje të gjenerojë force, të kuptojë se si të përdorë më mirë njerëzit, stërvitjen dhe armët, ka theksuar Cavoli, teksa ka shtuar se përsa I përket armëve dhe pajisjeve ushtarake, është në dorë të aleatëve. Nga ana tjetër Ukraina është përgjegjëse për fuqinë punëtore dhe situata atje po përmirësohet pasi parlamenti miratoi ligjin për mobilizimin në prill. Sipas këtij ligji burrat ukrainas të moshës 25 deri në 60 vjeç duhet të regjistrohen për shërbimin ushtarak në Ukrainë dhe jashtë saj. Më shumë se 4 milionë ukrainas janë regjistruar tani si potencialisht të gatshëm për të shërbyer.