Presidenti francez Emmanuel Macron, i cili u ka bërë thirrje vendeve perëndimore që t'i japin Ukrainës garanci "të prekshme dhe të besueshme" për sigurinë, tha se pushtimi rus i Ukrainës ka ringjallur NATO-n - gati katër vjet pasi ai e quajti aleancën "me tru të vdekur”. “Në Dhjetor të 2019-ës, unë pata fjalë të ashpra për NATO-n, duke nënvizuar atëherë dallimet që ekzistonin në zemër të saj midis Turqisë dhe disa shteteve të tjera, duke folur për vdekjen e trurit. Sot mund të them se Vladimir Putin e ringjalli atë me goditjen më të keqe elektrike”, tha Macron në fjalimin e tij në samitin e GLOBSEC në Bratislavë më 31 maj. Udhëheqësi francez tha se ai dëshiron që vendet anëtare të Bashkimit Evropian të diskutojnë thellimin e bashkëpunimit për të fituar aftësitë e tyre sulmuese dhe për të garantuar sigurinë e tyre. Ai ftoi ministrat evropianë të mbrojtjes për të diskutuar këtë temë gjatë një konference në Paris më 19 qershor. Ai u bëri thirrje gjithashtu vendeve të bllokut që të blejnë pajisje mbrojtëse të prodhimit evropian. Macron tha se çështja nuk është të zëvendësohet NATO me një strukturë mbrojtëse të dominuar nga franko-gjermanët, por "çështja është të ndërtohet një Evropë e fortë". Pamjet: AFP