Avionët luftarakë të NATO-s rrëzuan një dron mbi Lituani pasi u dha një alarm në kryeqytet, Vilnius dhe në rajonin përreth, ndërsa Polonia ngriti në ajër avionë luftarakë më pak se një ditë pasi kishte nxjerrë nga ujërat e saj një dron të dyshuar rus. Droni në Lituani u rrëzua në pjesën jugore të vendit, jashtë qytetit të Kaunasit, njoftuan autoritetet e emergjencës të martën herët. Droni vinte nga Bjellorusia fqinje dhe po lëvizte drejt perëndimit, sipas informacioneve nga qendra e menaxhimit të krizave të Lituanisë. Ndërkohë, Polonia aktivizoi forcën e saj ajrore si masë parandaluese në mes të sulmeve me dronë rusë ndaj Ukrainës. Të hënën, ushtria polake nxori nga deti një dron të dyshuar rus, në bregdetin e Baltikut, në veri të vendit. Lituania, Letonia dhe Estonia – të gjitha anëtare të NATO-s që kufizohen me Rusinë – kanë raportuar vazhdimisht shkelje të hapësirave të tyre ajrore nga dronë dhe avionë rusë. Moska i ka mohuar akuzat.