Planet e NATO-s për t'u përfshirë më shumë në luftën në Ukrainë janë si një zjarrfikës që përpiqet të shuajë zjarrin me një flakëhedhës, tha të premten kryeministri hungarez Viktor Orban. Ky i fundit ka ruajtur marrëdhënie të mira me Moskën dhe është përplasur me vendet perëndimore për mbështetjen për Ukrainën që nga fillimi i pushtimit rus dy vjet më parë. NATO po i afrohet luftës çdo javë, tha Orban ndërsa ministrat e jashtëm të aleancës po takoheshin në Pragë për të diskutuar ndihmën ushtarake për Ukrainën. Shefi i NATO-s, Jens Stoltenberg tha të enjten se "ka ardhur koha" që anëtarët e aleancës ushtarake të rishqyrtojnë disa nga kufizimet e lidhura me përdorimin e armëve që ata i kanë dhënë Ukrainës. Ndërsa udhëheqësit ukrainas u kërkuan qeverive të lehtësojnë kufizimet, vendet perëndimore u shfaqën gjithnjë e më shumë të ndara javët e fundit nëse Ukraina duhet të lejohet ose jo të godasë objektivat në tokën ruse.