Estonia, një anëtare e NATO-s, nuk ka dyshim se Shtetet e Bashkuara do ta ndihmojnë në mbrojtjen e saj nëse Rusia sulmon, tha ministri i saj i mbrojtjes për agjencinë e lajmeve Reuters, ndërsa paralajmëroi se Evropa nuk është gati t'i kundërvihet Moskës e vetme. Inteligjenca estoneze paralajmëroi në shkurt se fqinja e saj Rusia tashmë po grumbullon municione për luftërat e ardhshme pas përfundimit të konfliktit në Ukrainë. Rusia i ka përshkruar akuzat e udhëheqësve evropianë se mund të sulmojë NATO-n si të pakuptimta. Presidenti amerikan Donald Trump, këtë muaj kërcënoi të tërheqë SHBA-të nga aleanca për shkak të refuzimit të anëtarëve evropianë për të dërguar anije për të zhbllokuar Ngushticën e Hormuzit pranë Iranit. Aleanca ishte tashmë e tronditur nga planet e tij për të marrë Grenlandën nga Danimarka, një aleate e NATO-s. Por Hanno Pevkur, ministër i mbrojtjes i Estonisë, tha se nuk kishte asnjë dyshim se SHBA-të do të vinin në mbrojtje të saj nëse Rusia sulmon. "Po, unë i besoj Shteteve të Bashkuara dhe po, u besoj të gjithë aleatëve tanë", tha ai gjatë një vizite në kryeqytetin lituanez, Vilnius. Ai tha se SHBA-të kanë nevojë për Evropën për ushtrinë e saj, po aq sa Evropa ka nevojë për SHBA-në, kështu që "nuk besoj se NATO do të shembet".