Nato po zhvillon takime me dyer të mbyllura me skenaristë, regjisorë dhe producentë filmash dhe televizionesh në të gjithë Evropën dhe SHBA-në, zbulon gazeta Guardian, duke nxitur aludimet se aleanca po kërkon të përdorë ekranet për të gjeneruar "propagandë" për bllokun. Aleanca ka mbajtur tre takime me profesionistë të filmit dhe televizionit në Los Angeles, Bruksel dhe Paris dhe do të vazhdojë "serinë e saj të takimeve të fshehta" muajin tjetër në Londër, duke u takuar me anëtarët e Shoqatës së Shkrimtarëve të Britanisë së Madhe, e cila përfaqëson skenaristët profesionistë në Mbretërinë e Bashkuar.