Stërvitja e përvitshme e NATO-s për parandalimin bërthamor, Steadfast Noon, do të organizohet nga Holanda dhe do të fillojë javën e ardhshme, me 71 avionë nga 14 vende që marrin pjesë, thanë zyrtarët e aleancës ushtarake perëndimore të premten. Stërvitja "dërgon një sinjal të qartë për çdo kundërshtar të mundshëm se ne do të mbrojmë të gjithë aleatët nga të gjitha kërcënimet", tha Sekretari i Përgjithshëm i NATO-s Mark Rutte. Rutte i bëri komentet e tij në një mesazh video të regjistruar në bazën ajrore Volkel në Holandë, mikpritësja kryesore e stërvitjes së këtij viti. Bazat Kleine Brogel në Belgjikë, Lakenheath në Britani dhe Skrydstrup në Danimarkë do të përfshihen gjithashtu, tha NATO. "Ne duhet ta bëjmë këtë sepse na ndihmon të sigurohemi që parandalimi ynë bërthamor, të mbetet sa më i besueshëm, sa më i sigurt dhe sa më efikas që të jetë e mundur", tha Rutte. Stërvitja nuk përdor armë bërthamore, por simulon skenarë në të cilët ato mund të përdoren, thanë zyrtarët e NATO-s. Që nga pushtimi i Ukrainës nga Rusia në vitin 2022, zyrtarët rusë kanë paralajmëruar herë pas here për rrezikun e konfrontimit bërthamor me NATO-n, e cila e ka dënuar një retorikë të tillë si të papërgjegjshme. Megjithatë, në javët e fundit tensionet bërthamore janë ftohur. Muajin e kaluar, Presidenti rus Vladimir Putin ofroi të mbajë në fuqi edhe për një vit kufizimet mbi armët bërthamore strategjike të dislokuara, të përcaktuara në Traktatin e Ri START, që skadon shkurtin e ardhshëm. Jim Stokes, drejtori i politikës bërthamore të NATO-s, tha në selinë e aleancës në Bruksel se Steadfast Noon ishte një stërvitje "rutinë" dhe se "nuk ishte e drejtuar ndaj asnjë vendi". "Gjithashtu nuk është e lidhur me ndonjë ngjarje në botën reale", tha ai.