Sekretari i Përgjithshëm I Nato-s, Jens Stoltenberg ishte në Turqia në pjesën e parë të vizitës dy ditore që e coi më pas dhe në Athinë. Gjatë ndalesës në kryeqytetin turk, Stoltenberg pati bisedime më dyer të mbyllura me Presidentin Rexhep Tajip Erdogan e u takua dhe zyrtarë të tjerë të lartë të qeverisë për të folur mbi situatën e sigurisë në rajon, mbështetjen e NATO-s për Turqinë dhe krijimin e një mekanizmi ushtarak për c`tensionimin e situatës me Greqinë. Pas një takimi me Ministrin e Jashtëm turk Mevlüt Çavuşoğlu, numri një I aleancës vlerësoi kontributet e Turqisë në misionet e saj, duke përfshirë ato në Afganistan, Irak dhe Kosovë. Stoltenberg theksoi gjithashtu angazhimin e fortë të NATO-s për sigurinë e Turqisë duke shtuar mbrojtjen e saj ajrore kundër sulmeve raketore nga Siria dhe duke rritur praninë ajrore dhe detare të Aleancës. Sekretari i Përgjithshëm mirëpriti edhe krijimin e një mekanizmi ushtarak për zvogëlimin e rrezikut nga incidentet e përplasjet në Mesdheun lindor. Kjo përfshin një angazhim për të përdorur një linjë telefonike të sigurt që është vendosur midis Greqisë dhe Turqisë.” Gjate bisedës me Cavusoglu u prekën dhe cështjet e gjendjes në Libi e Siri, luftimet në dhe përreth Nagorni-Karabakut, dhe blerja e sistemeve S-400 prej Turqisë.