Aleatët e NATO-s duket se po ecin drejt dërgimit të trupave në ukrainë për të trajnuar mbrojtësit e vendit, një lëvizje kjo që do të ishte një tjetër shkelje e vijës së mëparshme të kuqe dhe mund të tërheqë SHBA-në dhe evropën në luftë në mënyrë më të drejtpërdrejtë. Disa vende anëtare të NATO-s po diskutojnë mundësinë e dërgimit të instruktorëve ushtarakë ose kontraktorëve në Ukrainë për të trajnuar trupat e Kievit dhe për të ndihmuar në riparimin e pajisjeve, raporton Neë York Times. Ukraina u ka kërkuar Shteteve të Bashkuara dhe vendeve të tjera të NATO-s që të ndihmojnë në trajnimin e 150,000 trupave, më afër vijës së frontit. Megjithatë, SHBA-të duken në mëdyshje, për shkak të rrezikut të sulmeve ndaj instruktorëve, cka edhe mund të cojë në aktivizimin e klauzolës së mbrojtjes kolektive të NATO-s. Disa zyrtarë sugjeruan vazhdimin e trajnimit të një numri të madh të rekrutëve ukrainas në Gjermani dhe Poloni, siç është bërë edhe më parë. Megjithatë, kjo qasje përfshin sfida të konsiderueshme logjistike në transportimin e një numri kaq të konsiderueshëm trupash. Disa vende të NATO-s, duke përfshirë Britaninë, Gjermaninë dhe Francën, po shqyrtojnë mundësinë e vendosjes së kontraktorëve të mbrojtjes në Ukrainë, ndërsa Shtëpia e Bardhë po rishikon qëndrimin e saj për ndalimin e kontraktorëve amerikanë të mbrojtjes që të veprojnë atje. Debati rreth trupave të NATO-s në Ukrainë u ndez nga komentet e bëra nga presidenti francez Emmanuel Macron në shkurt, kur ai foli për mundësinë e dërgimit të trupave në Ukrainë nëse do të ishte e nevojshme. Ukraina ka mungesë trupash në front dhe kjo ka arritur një pikë kritike dhe pozicioni i saj në fushëbetejë, javët e fundit është përkeqësuar ndjeshëm ndërsa rusia ka përshpejtuar avancimin, duke përfituar edhe nga vonesat e mbërritjes së armëve amerikane. Si rezultat, zyrtarët ukrainas janë detyruar të kërkojnë ndihmë për trajnimin e 150 mijë rekrutëve të rinj, më afër vijës së frontit, për dislokim më të shpejtë të tyre. Sipas Ney York Times, deri më tani, SHBA ka thënë jo për këtë kërkesë, por gjenerali Charles Q. Braun, shef i shtabit të përgjithshëm, tha të enjten se një dislokim i trajnuesve të natos duket i paevitueshëm. “Ne me shumë gjasa do të bëjmë këtë, në një moment të caktuar”, tha ai.