Ndihmësi i Presidentit rus Vladimir Putin, Nikolai Patrushev, pretendoi të martën se NATO po komploton për të pushtuar Kaliningradin, enklavën e Rusisë që është e rrethuar nga anëtarë të aleancës ushtarake. Patrushev, i cili më parë ka shërbyer si sekretar i Këshillit të Sigurisë së Rusisë, e bëri komentin në një intervistë për agjencinë e lajmeve të Kremlinit, Tass. Patrushev, një nga aleatët më të ngushtë të Putinit, më herët ka punuar në krah të presidentit rus kur ai ishte pjesë e KGB-së në Shën Petersburg. Ai është një avokat i njohur i politikave të linjës së ashpër të Kremlinit dhe ka mbrojtur publikisht vendimin e Putinit për të pushtuar Ukrainën. Shpesh madje është reklamuar edhe si pasardhësi më i mundshëm i Putinit, pasi pikëpamjet e Patrushev shihen gjerësisht si të përafërta me ato të presidentit. Kaliningradi është një qytet port rus me rëndësi strategjike në bregdetin jugor të Baltikut, i ndarë nga pjesa tjetër e Rusisë dhe që kufizohet nga anëtarët e NATO-s, Lituania dhe Polonia. Patrushev pretendoi se forcat e NATO-s po përgatiten në mënyrë aktive për pushtimin e rajonit nën maskën e stërvitjeve ushtarake rutinë në Detin Baltik. Qershorin e kaluar, rreth 9,000 trupa nga 20 vende të NATO-s morën pjesë në stërvitje në zonë, të cilat përfshinin zbulimin e nëndetëseve, pastrimin e minave detare, zbarkimet dhe reagimin mjekësor ndaj skenarëve me viktima masive. Këtë javë po ashtu, stërvitja detare e kërkim-shpëtimit e NATO-s, Dynamic Mercy, filloi në Detin Baltik. Patrushev më parë e ka akuzuar Perëndimin se po përpiqet të izolojë Kaliningradin. "Vendet e Perëndimit po përpiqen ta ndërlikojnë tranzitin e ngarkesave dhe pasagjerëve në Kaliningrad në masën maksimale me qëllim që të izolojnë rajonin e Kaliningradit dhe të ndërpresin lidhjet e transportit me territorin tjetër të Rusisë", tha Patrushev vjeshtën e kaluar.