Të paktën 14 persona janë vrarë, mes tyre edhe një shtetas amerikan, dhe 44 të tjerë janë plagosur si pasojë e sulmeve me dronë dhe raketa të kryera nga Rusia mbi Kiev, thanë zyrtarët ukrainas të martën. Zyrtarët thanë se forcat ruse kryen sulm me raketa dhe dronë, duke shënjestruar disa qarqe të kryeqytetit ukrainas. Kryebashkiaku i Kievit, Vitaly Klitschko, tha se nëntë persona janë plagosur në qarkun Sviatoshinski dhe 11 të tjerë në Solomianski. Gjashtë persona janë shtruar në spital, ndërkaq edhe dy qarqe të tjera janë përballur me shpërthime të zjarreve pas sulmeve. Klitschko tha se një amerikan 62 vjeç “u vra në një shtëpi në qarkun Solomianski”. Edhe pjesë të tjera të Ukrainës janë përballur me sulme, përfshirë qytetin e Zaporizhias, ku zyrtarët kanë raportuar për të paktën katër sulme. Sulmi i fundit mbi Kiev zgjati për thuajse nëntë orë dhe është më i fundit në një valë sulmesh masive me dronë dhe raketa ndaj kryqytetit ukrainas, kohët e fundit. SHpërthime pati edhe në qytetin port në jug të ukrainës, Odesa ku u plagosën 13 persona, përfshirë një fëmijë, sipas guvernatorit rajonal Oleh Kiper. Ndërkohë, komanda operacionale e ushtrisë polake bëri të ditur se avionët e NATO-s ishin ngritur në ajër në mes të sulmeve intensive ruse në ukrainë. E gjithë kjo ndodhi ndërsa udhëheqësit botërorë u mblodhën në takimin e G7-ës në Kanada, ku pritet të marrë pjesë edhe presidenti ukrainas Volodimir Zelensky. Ky i fundit duhej të takohej me Donald Trump gjatë ditës, por presidenti amerikan u kthye papritur në Uashington të hënën në mbrëmje për shkak të tensioneve në Lindjen e Mesme.