Ekipet në terren në qendrën hapësinore Kenedi janë gati për një përpjekje të dytë për lancimin e raketës së gjeneratës së re të NASA-s, për në hënë...në fluturimin debutues të saj, me shpresën se kanë riparuar problemet inxhinierike që ndalën numërimin mbrapsht pesë ditë më parë. Raketa e re, e lartë sa 32 kate, dhe kapsula e saj orion, janë gati për nisje në Cape Canaveral të Floridas, duke i dhënë jetë kështu edhe programit ambicioz të NASA-s për në hënë e më pas edhe në mars, Artemis, 50 vite pas misionit të fundit apollo në hënë... Përpjekja e mëparshme për lëshimin e raketës, të hënën, përfundoi me problemet teknike që detyruan ndaljen e numërimit mbrapsht dhe shtyrjen e fluturimit pa ekuipazh. Testet tregojnë se teknikët që atëherë kanë rregulluar problemin që coi në anulimin e fluturimit të hënën. Moti ndërkohë mbetet një faktor që nuk mund të kontrollohet nga NASA. Parashikimi tregonte 70 për qind shanse për mot të favorshëm për lancimin. Nëse numërimi mbrapsht do të ndalet sërish, atëherë NASA do të mund të riprovojë të hënën apo të martën.