Çmimet e naftës u rritën të hënën, ndërsa aksionet u luhatën me Shtetet e Bashkuara dhe Iranin që nuk ishin më afër përfundimit të luftës së tyre tetë-javore pasi Donald Trump anuloi udhëtimin e të dërguarve të tij për bisedime paqeje në fundjavë. Shpresat se të dy palët mund të bënin përparim gjatë negociatave në Pakistan u shuan të shtunën nga presidenti amerikan, i cili tha se nuk kishte kuptim "të rrinim ulur pa folur për asgjë". Ai tha në Fox Neës se i kishte thënë ekipit të tij: "Ne i kemi të gjitha kartat. Ata mund të na telefonojnë kur të duan, por ju nuk do të bëni më fluturime 18-orëshe për të qëndruar ulur pa folur për asgjë". Megjithatë, ai u tha gazetarëve se një propozim i rishikuar nga Irani kishte ardhur brenda pak minutash nga vendimi i tij. "Ata na dhanë një dokument që duhet të ishte më i mirë dhe kur e anulova, brenda 10 minutash, morëm një dokument të ri që ishte me të vërtetë shumë më i mirë", tha Trump, pa dhënë hollësi. I pyetur nëse anulimi i udhëtimit të negociatorëve amerikanë drejt Pakistanit, nënkuptonte një kthim në luftime, Trump tha: "Jo, nuk do të thotë këtë. Ne nuk kemi menduar ende për këtë." Por edhe para lëvizjes së Trump, perspektivat për bisedime ishin të pasigurta, me televizionin shtetëror iranian që tha se Ministri i Jashtëm Abbas Araghchi nuk kishte plane për t'u takuar me zyrtarë amerikanë dhe se Islamabadi do të vepronte si një kanal për propozime.