Delegacioni i Bashkimit Europian në Shqipëri, ka reaguar lidhur me ndërprerjen e seancës plenare në të cilën ishte parashikuar prezantimi i programit qeverisës dhe kabientit qeveritar. Delegacioni I BE thekson se “Parlamenti duhet të jetë një forum për debat konstruktiv, ku diskutohen politika dhe paraqiten pikëpamje alternative, duke promovuar kështu një kulturë dialogu”, teksa shton se “është për të ardhur keq që shqiptarët u privuan nga mundësia për t'u informuar siç duhet dhe plotësisht rreth programit të Qeverisë dhe për të dëgjuar përfaqësuesit e saj të zgjedhur të diskutojnë përmbajtjen e tij, në përputhje me dispozitat e ligjit”. Në reagimin në fjalë, poashtu thuhet se në kontekstin e anëtarësimit Parlamenti ka një rol vendimtar për të luajtur në debatin dhe miratimin e reformave legjislative që lidhen me BE-në, teksa theksohet që duhet të jetë një proces gjithëpërfshirës dhe transparent. Në përmbyllje të reagimit, Delegacioni i BE shton se do të vijojë angazhimin për forcimin e rolit të parlamentit si një institucion I dialogut të hapur e gjithpërfshirës politik.