Samiti Shqipëri – Izraeli bëri bashkë 40 kompani inovative izraelite. Në fjalën e tij, kryeministri Edi Rama kujtoi historinë që lidh dy popujt, teksa një rëndësi të veçantë i kushtoi ndihmës izraelite pas sulmeve kibernetike iraniane që shenjëstruan vendin tonë. Rama: “E zbuluam sigurinë kibernetike në mënyrën më të vështirë. Si rezultat i mikpritjes sonë. Ne ju hapëm derën disa mijëra iranianëve, të cilët janë në opozitë dhe nuk e bëmë për shkak të ndonjë motivi politik, nuk e bëmë që t’u jepnim një platformë në Shqipëri, të luftonin nga Shqipëria këtë regjim, e bëmë sepse jetët e tyre ishin në rrezik dhe askush nuk donte t’i shpëtonte. Kjo erdhi me hakmarrje nga regjimi Iranian që nuk e duronte dot këtë gjë dhe na sulmoi. Në fakt ishim shumë të kënaqur kur pamë në atë moment që Izraeli u soll si mik dhe na ofroi ndihmë, falë kësaj ndihme dhe ndihmës edhe të miqve tanë nga Emiratëve dhe ekspertëve nga SHBA, i mbijetuam këtij sulmi. Mësuan se na duhet të investojmë dhe të ndërtojmë një sistem mbrojtje dhe nuk është e lehtë sepse sistemi ynë mbrojtës duhet të përballonte sulmet e një armiku jo të lehtë siç e dini shumë mirë të gjithë.” Rama u shpreh se hebrenjtë janë gjithmonë të mirëpritur në Shqipëri dhe përshëndeti rritjen e numrit të turistëve izraelitë.