Muzeu i Luvrit në Francë do të instalojë 100 kamera në ambjentet e jashtme deri në fund të vitit 2026, si pjesë e masave për të forcuar sigurinë pas grabitjes spektakolare të muajit të kaluar, tha drejtori i tij të mërkurën. Laurence Des Cars tha gjithashtu në një seancë dëgjimore në Asamblenë Kombëtare se lidhjet me policinë e Parisit do të forcohen me instalimin e një "stacioni të avancuar policor brenda pronës së Luvrit". Grabitja e 19 tetorit, në mes të ditës, në të cilën katër grabitës u larguan me bizhuteri me vlerë 102 milionë dollarë, ka ngritur dyshime mbi besueshmërinë e muzeut më të vizituar në botë si kujdestar për veprat e tij të panumërta. Ndërsa hetuesit kanë akuzuar katër të dyshuar për përfshirje në grabitje, thesaret ende nuk janë rikuperuar. Zyrtarët kanë pranuar se kishte mbulim të pamjaftueshëm me kamera sigurie të mureve të jashtme të muzeut dhe asnjë mbulim të ballkonit të përfshirë në vjedhje. Pas grabitjes, zyrtarët francezë thanë se Luvri do të merrte masa sigurie shtesë deri në fund të vitit. Një raport i publikuar muajin e kaluar nga organi publik i auditimit të Francës tha se pamundësia e muzeut për të përditësuar infrastrukturën e tij u rëndua nga shpenzimet e tepërta për veprat e artit.