Klara Kazani u shpall fituese e ‘Muza Competiton’, e eventit që bëri bashkë krijues nga të gjitha trevat shqipfolëse. Nga 10 finalistët që morën pjesë në këtë event, koleksioni Nën vello i Kazanit, rezultoi më i pëlqyeri, si pasojë kjo e fundit u kurorëzua si fituese. Pjesë e eventit ishte edhe kryebashkiaku Erion Veliaj, i cili në fjalën e tij shprehu kënaqësinë që në kryeqytetin shqiptar realizohen kompeticione të tilla, që bëjnë bashkë shqiptarët. “Ne jemi shumë krenarë për fqinjët tanë sepse ne shqiptarët rrethohemi nga tanët, nga Kosova, Maqedonia e Veriut, Mali i Zi, Lugina e Preshevës dhe ndaj sot jam shumë i lumtur që, për këtë fqinjësi, që është më shumë se sa fqinjësi, është gjaku ynë, ne kemi dedikuar këtë edicion.” Duke iu referuar njërës prej modeleve që performoi në pasarelë, Veliaj tha se ndonëse asaj i humbi këpuca, e vijoi rrugëtimin duke mos e lënë përgjysmë, pasi destinacioni është mision më i rëndësishëm se mjeti.