Elon Musk ka hapur një front të ri përplasjesh me Brukselin, duke vënë në pikëpyetje legjitimitetin demokratik të Presidentes së Komisionit Ursula von der Leyen, duke argumentuar se ajo duhet të zgjidhet drejtpërdrejt nga qytetarët e BE-së "nëse Evropa dëshiron të mbrojë demokracinë e saj". “Nëse demokracia është themeli i lirisë, atëherë sigurisht që pozicioni juaj si udhëheqës i BE-së duhet të zgjidhet drejtpërdrejt nga populli”, komentoi Musk në një postim të Ursula von der Leyen në Platformën X. Musk reagoi ndaj prezantimit nga Ursula von der Leyen të iniciativës "Mburoja e Demokracisë" — një strategji e re e BE-së që synon forcimin e mbrojtjes kundër ndërhyrjeve të huaja në internet, përfshirë proceset zgjedhore. "Demokracia është themeli i lirisë sonë. Demokracia është themeli i prosperitetit tonë. Demokracia është themeli i sigurisë sonë", shkroi von der Leyen në rrjetet sociale. Politikania gjermane e prezantoi për herë të parë idenë e Mburojës së Demokracisë në fjalimin e saj të fushatës në Samitin e Demokracisë në Kopenhagen vitin e kaluar, si pjesë e fushatës së saj për mandatin e dytë si Presidente e Komisionit, përpara zgjedhjeve evropiane të vitit 2024.