Kryeministri i Kosovës, Albin Kurti tha të dielën se beson që Murat Jashari, nga familja e heroit Adem Jashari, do të ishte figura ideale për postin e presidentit dhe nëse për partitë politike në Kosovë do të jetë e pamundur të gjendet një figurë unifikuese, atëherë secila parti duhet të ketë kandidatin e vet. Murat Jashari, djali i Rifat Jasharit, vëllait të Adem Jasharit, dhe anëtarë tjerë të familjes, e kanë bërë të qartë më herët gjatë javës se nuk kanë ambicie për postin e presidentit, dhe një post të tillë do ta shqyrtonin vetëm një rast të ndonjë gjendjeje të jashtëzakonshme apo lufte civile. Kurti ka thënë se duke marrë për bazë situatën aktuale gjeopolitike në botë, ai beson se vendit i duhet “një figurë që u bën ballë shtrëngatave” me të cilat përballet shteti, prandaj sipas tij, Murat Jashari “do të ishte zgjedhja e duhur në momentin e duhur” dhe vazhdon të mbetet rasti ideal. “Bindja ime ka qenë dhe vazhdon të mbetet se një figurë, profesor e personalitet si Murat Jashari, do të gëzonte mbështetje gjithëpartiake, do të ishte nder për republikën, stabilitet për institucionin dhe siguri për kombin. Rrethanat gjeopolitike, lufta në Ukrainë, konflikti SHBA-Iran dhe tensionet në Lindjen e Afërt dhe të Mesme, si dhe kërcënimet e njëpasnjëshme nga Serbia, përfshirë agresionin terrorist në Banjskë, sulmin në kanalin e Ibër-Lepencit, dhe kërcënimet e përditshme nga fqinji ynë verior kërkojnë një moment reflektimi”, tha Kurti në mbledhjen e Këshillit të Përgjithshëm të LVV-së. Presidentja aktuale, Vjosa Osmani ka thënë se dëshiron edhe një mandat tjetër, por Lëvizja Vetëvendosje, e cila e pati kandiduar për mandatin e parë, tani nuk e përmend emrin saj. Edhe partitë opozitare duket se nuk e mbështesin atë duke qenë se rast pas rasti e kanë kritikuar për njëanshmëri.