Fronti Demokratik prorus në Mal të Zi paralajmëroi zëvendëskryeministrin shqiptar, Nik Gjeloshaj, se mund të përjashtohet nga Qeveria, pasi ai kundërshtoi nismat për përfshirjen e dyshtetësisë dhe të serbishtes si gjuhë zyrtare. “Ne, me dashamirësi, e këshillojmë Gjeloshajn që ta pranojë realitetin social në Mal të Zi dhe të mos përpiqet të na i mohojë të drejtat që i kanë të gjithë të tjerët... sepse nëse kafshon shumë, mund t’i thyejë dhëmbët”, thuhet në komunikatën e DF-së, e cila është pjesë e koalicionit qeveritar. Zëvendëskryeministri Gjeloshaj, njëherësh edhe ministër i Zhvillimit Ekonomik, ishte në Uashington, ku nënshkroi Memorandumin për Bashkëpunim Strategjik Ekonomik ndërmjet Malit të Zi dhe SHBA-së në momentin e lëshimit të kësaj deklarate. Ai reagoi përmes një postimi në rrjetet sociale. Ai tha se pas këtij kërcënimi ndodhet kreu i parlamentit të Malit të Zi, Andrija Mandiç. Gjeloshaj tha se këtij kërcënimi do t’i japë përgjigje konkrete, duke paralajmëruar ngritjen e një padie në gjykata. Ndërkohë, në një intervistë dhënë Zërit të Amerikës, Gjeloshaj tha se iniciativat e serbëve për ndryshimin e Ligjit për shtetësinë malazeze dhe për miratimin e Ligjit për agjentët e huaj - sipas modelit të ligjit rus - kanë për qëllim ngadalësimin e rrugës evropiane të Malit të Zi.