Intensiteti i operacioneve ushtarake amerikane, në Iran, ka ngritur pikëpyetje në lidhje me rezervat e ushtrisë amerikane. Vetë presidenti Donald Trump, shkroi në faqen e tij Truth Social se Shtetet e Bashkuara "nuk janë aty ku duan të jenë" për sa i përket rezervave të tyre të armëve të nivelit të lartë, ndërsa forcat amerikane po përdorin sasi të mëdha municionesh kundër Iranit. "Në nivelin më të lartë, ne kemi një furnizim të mirë, por nuk jemi aty ku duam të jemi", shkroi ai, duke shtuar se SHBA-të kanë armë të mjaftueshme "të nivelit të mesëm dhe të lartë". "Luftërat mund të zhvillohen 'përgjithmonë' dhe me shumë sukses, duke përdorur vetëm këto furnizime, të cilat sidoqoftë janë më të mira se të vendeve të tjera!," shtoi ai. SHBA po planifikon të zhvendosë sisteme të mbrojtjes ajrore që synojnë të mbrojnë aleatët amerikanë në Lindjen e Largët nga Kina në Lindjen e Mesme, sipas raporteve të mediave koreane. Sisteme si Patriot dhe THAAD, si dhe teknologjia e mbikëqyrjes dhe zbulimit si dronët MQ-9 Reaper të bazuar në Bazën Ajrore Gunsan në Korenë e Jugut, janë ndër ato që mund të shkojnë në Lindjen e Mesme.