Astronomët kanë identifikuar një zonë rreziku, nga e cila, asteroidë potencialisht shkatërrimtarë mund të arrijnë tokën, të papikasur. Shkencëtarët e financuar nga NASA zbuluan se objektet qiellore që afrohen nga lindja, në qiellin e natës, mund të duken të qëndrueshëm për shkak të rutinës së përditshme të rrotullimit të tokës dhe udhëtimit të saj përreth diellit. Kjo do të thotë se ata nuk pikasen nga rrjeti i teleskopëve të kompjuterizuar që kanë si detyrë të gjurmojnë kërcënime të tilla. Kërkimi është zhvilluar pasi komuniteti astronomik u shokua në 2019-ën nga një përplasje e evituar për fije të perit, në të cilën një asteroid thuajse 100 metra, kaloi pranë tokës në një largësi prej 70 mijë kilometrash. Ai u pikas vetëm 24 orë para arritjes në këtë distancë. Kongresi amerikan i ka vendosur NASA-s detyrën e identifikimit të 90 për qind të asteroidëve me diametër 140 metra ose më të madh, një përmasë kjo që do të mund të shkatërronte një rajon apo një qytet nëse do të godiste tokën. Agjencia ka nisur ndërkohë edhe punën për gjetjen e metodave që do të parandalonin incidente të tilla. Vitin e kaluar ajo nisi një mision eksperimental që ka për qëllim të bombardojë një trup qiellor për të zbuluar nëse kjo do të devijojë kursin e tij.