Presidenti Vladimir Putin tha se Rusia kishte goditur Ukrainën me një raketë të re balistike hipersonike me rreze të mesme veprimi në përgjigje të përdorimit të raketave amerikane dhe britanike nga Kievi kundër Rusisë. Putin tha se lufta në Ukrainë po përshkallëzohej drejt një konflikti global pasi Shtetet e Bashkuara dhe Britania lejuan Ukrainën të godiste më thellë Rusinë me raketat e tyre dhe paralajmëroi Perëndimin se Moska mund të kundërpërgjigjet. Në përgjigje të drejtpërdrejtë ndaj përdorimit të raketave të SHBA-së dhe Britanisë nga Ukraina, ai tha se Rusia kishte lëshuar "Oreshnik", një nga raketat e saj më të reja me rreze të mesme veprimi, mbi një shënjestër në qytetin ukrainas Dnipro. Qyteti është shtëpia e kompanisë së raketave hapësinore Pivdenmash, e njohur për rusët si Yuzhmash. Putin tha se "Oreshnik" ishte një raketë balistike hipersonike. Ai tha se ajo udhëton 10 herë më shpejt se zërit dhe kështu është e pakapshme. Burimet ruse thanë se distanca e përshkruar nga raketa ishte 5,000 km, cka e lejon rusinë të godasë pjesën më të madhe të evropës dhe bregun perëndimor të SHBA-së. Ajo ka mjete shënjestrimi të pavarura, mban koka luftarake të ndara, që janë në gjendje të godasin objektiva të ndryshme. Anatoly Matviychuk, një ekspert ushtarak rus, tha se raketa mund të mbajë gjashtë deri në tetë koka luftarake konvencionale ose bërthamore. Pentagoni tha se raketa që lëshoi Rusia ishte e bazuar në raketën balistike ndërkontinentale (ICBM) "RS-26 Rubezh". Ai tha se SHBA ishte njoftuar për lëshimin e kësaj rakete përmes kanaleve të reduktimit të rrezikut bërthamor. Forcat ajrore të Ukrainës thanë një ditë më parë se Rusia kishte lëshuar një ICBM në Dnipro, megjithëse Shtetet e Bashkuara tha se kjo ishte e pasaktë. ICBM-të përkufizohen se kanë një rreze më të madhe se 5,500 km.