Reshjet e shiut që kanë përfshirë gjatë natës të gjithë vendin kanë sjellë probleme të shumta në very, ku më I prekur rezulton qarku I Kukësit. Nga reshjet pati rëshqitje gurësh dhe inertesh në rrugët nacionale, ndërsa në disa segmente vërshoi uji për shkak edhe të bllokimit të kanaleve kulluese. Ekipet e mirëmbajtjes kanë punuar pa ndërprerje për pastrimin e akseve, të cilat aktualisht raportohen të qarkullueshme. Situata e rëndë është shënuar dhe në bashkinë Has, ku gjatë natës është dëmtuar ura që lidh fshatin Dobrunë me fshatin Bardhosh. Po ashtu probeme të shumta në këtë qark ka pasur dhe me energjinë elektrike. Edhe Qarku Lezhë është përfshirë nga reshje intensive gjatë 24 orëve të fundit, të shoqëruara me erë të fortë, ku sipas të dhënave meteorologjike janë regjistruar 55 mm shi deri në orën 06:00. Në Kurbin, ekipet e emergjencave kanë nisur punën për pastrimin e kanaleve në Mamurras dhe zonat përreth.