Zyrtarët ukrainas raportuan të martën sulme me dronë dhe raketa ruse në Zaporizhja, Kryviy Rih dhe Kupjansk. Ndërkohë Ministria e Mbrojtjes e Rusisë tha se kishte zmbrapsur sulmet me dronë në rajonet e Moskës dhe Bryanskut ndërkohë që mbylli përkohësisht tre aeroporte në kryeqytet. Një person u plagos dhe 20 ndërtesa u dëmtuan pas një sulmi rus me raketa gjatë natës në Kryviy Rih, në rajonin e Dnipropetrovsk, tha guvernatori Serhiy Lysak në platformën Telegram. Rusia sulmoi edhe Zaporizhjan gjatë natës, duke shkaktuar dëme, por pa viktima, njoftoi sekretari i Këshillit Komunal të Zaporizhjas, Anatoliy Kurtev, në orët e para të së martës. “Brenda natës, armiku sulmoi sërish Zaporizhjën. Si pasojë e valës së shpërthimit, katër ndërtesa të larta pësuan dëmtime”, shkroi Kurtev në Telegram. Trupat ruse bombarduan edhe Kupjanskun dhe Vovçanskun në rajonin lindor të Harkivit gjatë natës. Guvernatori i rajonit, Oleh Synyehubov tha se katër ndërtesa banimi ishin dëmtuar dhe shkatërruar dhe një grua ishte plagosur lehtë. Ndërkohë, Ministria e Mbrojtjes e Rusisë tha herët në mëngjes se katër drone u rrëzuan gjatë natës, dy mbi rajonin e Moskës dhe dy mbi rajonin e Bryanskut, rreth 400 kilometra në jugperëndim të Moskës. Agjencia shtetërore ruse e lajmeve, TASS, raportoi se tre aeroporte të Moskës – Vnukovo, Domodedovo dhe Sheremetyevo – pezulluan përkohësisht fluturimet, pa dhënë ndonjë arsye për pezullimin. Aeroportet e Moskës kanë pezulluar fluturimet disa herë gjatë ditëve të fundit për shkak të atyre që autoritetet thanë se ishin sulme ukrainase me dronë.