Raketa të tjera u lëshuan nga Rusia në drejtim të Kievit. Sulmi ndodhi orët e para të mëngjesit të kësaj të diele, ndërsa autoritetet bën me dije se mundën të rrëzonin dy nga tre raketat e nisura. Ende nduk dihet nëse ka pasur viktima nga raketa e tretë që shpërtheu. Rusia ka nisur një sulm në shkallë të gjerë, me raketa e dronë në drejtim të Ukrainës. Shënjestër kryesisht ka qenë infrastruktura por dhe rrjeti energjetik, pjesa më e madhe e të cilit është dëmtuar nga shpërthimet. Kompania Ukrenerho raportoi se nga bombardimet janë dëmtuar sistemet e shpërndarjes së energjisë në rajonet e Zaporizhjas dhe Lvivit. Ofensiva vjen pas bombardimeve në Harkiv, qytetin e dytë më të madh të Ukrainës, ku të paktën tre njerëz raportohet se janë vrarë deri më tani dhe 56 të tjerë janë plagosur. Sipas presidentit ukrainas Volodymyr Zelensku më shumë se 2.400 bomba janë lëshuar në Ukrainë këtë muaj, 700 prej të cilave vetëm në Harkiv. Ai përsëriti edhe njëherë thirrjen ndaj perëndimit për mbrojtje shtesë ajrore.