Rusia ka dënuar me pesë vjet burg një amerikan për transport të paligjshëm armësh, tha një gjykatë të hënën, duke saktësuar se një armë u gjet në jahtin e tij pasi ai u ankorua në qytetin port të Soçit qershorin e kaluar. Dhjetëra perëndimorë, përfshirë amerikanë, janë burgosur në Rusi, veçanërisht pas fillimit të luftës në Ukrainë në vitin 2022, ku shumë prej tyre më vonë u bënë pjesë e këmbimeve të të burgosurve. "Një shtetas amerikan u shpall fajtor për transport të paligjshme të armëve të zjarrit", tha shërbimi për shtyp i gjykatave rajonale në një deklaratë. Ai e identifikoi amerikanin si Charles Wayne Zimmerman dhe tha se ai "e pranoi fajin" dhe u "dënua me pesë vjet burg". Shërbimi nuk përmendi se kur saktësisht u dënua Zimmerman, por tha se një ankesë kundër dënimit ishte refuzuar. Kjo ishte hera e parë që arrestimi dhe dënimi i tij është përmendur në median ruse, e cila zakonisht mbulon nga afër procedurat gjyqësore të qytetarëve të huaj.