Shpëtimtari i Gjeorgjisë, vegla e Rusisë, filantrop, oligark... Bidzina Ivanishvili është quajtur me të gjithë këto epitete por jo vetëm. Miliarderi, është personi më i pasur i Gjeorgjisë dhe themeluesi i partisë në pushtet, por rrallë herë shihet në publik dhe thuajse gjithnjë pas xhamit antiplumb. Megjithatë, prania e tij duket e fortë mbi këtë vend të vogël evropian të kapur mes Rusisë dhe Perëndimit, që në zgjedhjet e afërta mund të formësojë fatin e tij. Ivanishvili mund të shikojë nga lart qendrën e Tbilisit, nga një rezidencë masive në majë të një shkëmbi, rreth 60 metra mbi kryeqytet. Ai kënaq pasionet e tij ekzotike si mbajtja e peshkaqenëve dhe zebrave dhe mbjellja e pemëve të rralla. 68-vjeçari shihet nga shumë miq dhe armiq po ashtu si figura më e fuqishme e Gjeorgjisë, ose si një lloj eminence gri, edhe pse nuk ka mbajtur poste publike për më shumë se një dekadë. Ai i ka cilësuar zgjedhjet e së shtunës si një luftë ekzistenciale për të parandaluar që perëndimi të shtyjë Gjeorgjinë drejt një konflikti shkatërrues me ish-padronen, Rusinë, ashtu siç bëri me Ukrainën. "Gjeorgjia dhe Ukraina nuk u lejuan të anëtarësohen në NATO dhe u lanë jashtë," tha ai në një paraqitje të rrallë publike në një tubim pro-qeveritar në Tbilisi më 29 prill. “Të gjitha vendimet e tilla merren nga Partia e Luftës Globale, e cila ka një ndikim vendimtar në NATO dhe Bashkimin Evropian dhe e cila i sheh Gjeorgjinë dhe Ukrainën vetëm si mish për top”. Ndërsa shumica e 3.7 milionë banorëve të Gjeorgjisë janë të prirur për t'iu afruar Perëndimit, duke iu bashkuar BE-së dhe NATO-s, dhe kryesisht nuk i besojnë Rusisë, sondazhet tregojnë se mesazhi i Ivanishvilit bën jehonë tek shumë njerëz që duan të shmangin me çdo kusht fatin e Ukrainës. Janë të freskëta kujtimet e një lufte të vitit 2008 me Rusinë mbi rajonet separatiste të Osetisë Jugore dhe Abkhazisë, të mbështetur nga Moska, e cila zgjati pesë ditë dhe përfundoi me humbjen e Gjeorgjisë. Ivanishvili, i cili ishte pro-perëndimor gjatë dekadës së parë të partisë së tij në pushtet, nuk ishte i disponueshëm për t'u intervistuar për këtë artikull, ndërsa partia e tij Ëndrra Gjeorgjiane thotë se mbetet e përkushtuar ndaj integrimit në perëndim dhe për një politikë pragmatike ndaj Rusisë fqinje.