Reforma në drejtësi nuk duhet të njohë asnjë hap pas! Kështu deklaroi ambasadorja e re e Bashkimit Europian, Sofia Moreira de Sousa gjatë takimit të 22-të të komitetit parlamentar të Stabilizim Asocimit, ku veçoi si sukses krijimin e organeve të reja të drejtësisë, por kërkoi që puna në këtë drejtim të mos ketë kthim pas. Ambasadorja e BE në Tiranë, Sofia Moreira de Sousa: “Është e rëndësishme të mos kemi kthim mbrapa. Shqipria ka bërë hapa në reformën gjyqësore dhe ka ngritur organe gjyqësore të pavarura, është kthyer funksionimi i Gjykatës Kushtetuese, është mbyllur procesi i vettingut, të gjitha këto janë të rëndësishme për rritjen e llogaridhënies dhe forcimin e shtetit të së drejtës. Por, kjo nuk është një punë që mbyllet ketu. Puna për konsolidimin e reformës në drejtësi duhet të vazhdojë duke u fokusuar tek cilësia dhe duke siguruar të gjitha standardet që duhet të ketë sistemi i drejtëisë dhe ato që udhëhoqën vettingun. Këto rezultate duhet të jenë të pakthyeshme.” Diplomatja europiane u bëri thirrje ligjvënësve që çdo nismë ligjore që shkon në drejtim të integrimit në Bashkimin Europian të marrë kohën e vetë për t’u konsultuar dhe të jetë transparente me qytetarët.