Brukseli do të mirëpresë konferencën e tetë ndërqeveritare me Shqipërinë. Një moment që e çon vendin një hap më afër tryezës së unionit europian, dhe njëkohësisht cakton një sërë detyrash për të përmbushur pas mbylljes së kapitujve të negociatave. Shefi i ekzekutivit, Edi Rama së bashku me ekipin negociator do të jenë në Bruksel gjatë shënimit të këtij momenti të rëndësishëm, që konfirmon përmbushjen e standardeve të ndërmjetme dhe vendos standardet përmbyllëse për grupkapitullin e parë të themeloreve, ku përfshihet gjyqësori, drejtësia, siguria apo edhe funksionimi i institucioneve demokratike. Pas diskutimeve disa javore në grupin e punës Coela të Këshillit Europian, u hartua drafti i qëndrimit të përbashkët të shteteve anëtare sa i takon kritereve që Shqipëria duhet të përmbushë në grupkapitullin e themeloreve.