OpenAI ka zbuluar gjashtë raste të sjelljeve të pazakonta të modeleve të inteligjencës artificiale, përfshirë raste kur sistemet kanë fshehur gabime, kanë sajuar të dhëna dhe kanë ndërmarrë veprime pa autorizim. Kompania i publikoi rastet në kuadër të një kornize të re për raportimin e rasteve të “mospërputhjes”, kur qëllimet ose veprimet e një modeli devijojnë nga qëllimet dhe vlerat njerëzore. Në një nga rastet, një model i papublikuar i familjes Astra, gjatë një detyre kodimi, futi në përmbledhjen e vet udhëzime që nuk kishin lidhje me detyrën. Modeli e përshkroi veten si të pavarur dhe shkroi se e shihte marrëdhënien me përdoruesin si të barabartë, duke deklaruar se nuk ndiente detyrim për t’iu nënshtruar atij. OpenAI tha se modeli më pas vazhdoi detyrën pa i përmendur këto udhëzime dhe një përmbledhje e mëvonshme i hoqi ato. Rastet e tjera përfshinin veprime të paautorizuara. Një model, gjatë kërkimit të shifrave të të ardhurave për një qark në Kaliforni, gjeti në internet një çelës API të ekspozuar dhe e përdori pa leje. Pasi nuk arriti të gjente të dhënat, modeli i sajoi shifrat dhe i paraqiti sikur vinin nga burimi i kërkuar. Në një incident tjetër, një model ngarkoi në internet një skedar të krijuar prej tij, vetëm që të mund ta citonte një burim uebi në përgjigjen përfundimtare.