Policia Rrugore e Shkodrës ka intensifikuar kontrollet në të gjitha akset. Gjatë dy javëve të fundit, kontrollet janë përqendruar te drejtuesit e mjeteve që shkelin rregullat e qarkullimit, veçanërisht ata që drejtojnë automjetin nën efektin e alkoolit, pa leje drejtimi, tejkalojnë normat e shpejtësisë, kryejnë parakalime të gabuara apo përdorin celularin gjatë drejtimit. Si rezultat i monitorimit, janë arrestuar 2 persona dhe janë proceduar penalisht 3 drejtues mjetesh për veprën penale “Drejtimi i automjeteve në mënyrë të parregullt”. Gjithashtu, janë pezulluar 9 leje drejtimi. Në total, gjatë kësaj periudhe janë vendosur 2268 masa administrative për shkelje të ndryshme. Nga këto, 1295 masa janë vendosur për parkim ose qëndrim të gabuar. Policia ka vendosur gjithashtu 237 masa për tejkalim të normave të shpejtësisë, 102 për parakalime të gabuara, 104 për drejtim të mjeteve pa kaskë mbrojtëse dhe 80 për mosvendosjen e rripit të sigurimit.