Komisioni për Ekonominë dhe Financat, rrëzoi dekretin e presidentit Ilir Meta për “Kthimin për rishqyrtim të ligjit “Për tregjet financiare të bazuara në teknologjinë e regjistrave të shpërndarë”. Nëpërmjet këtij ligji rregullohet veprimtaria financiare e kriptomonedhave ose siç njihen ndryshe monedhat virtual. Në arsyetimin e presidentit për kthimin e këtij ligjit thuhej se krijon hapësirë për pastrim parash dhe se pavarësisht se monedha virtuale është e mirëpritur në shumë pjesë të botës, disa vende janë të kujdesshme për shkak të: paqëndrueshmërisë; natyrës së decentralizuar; kërcënimit të perceptuar ndaj sistemeve monetare aktuale; dhe lidhjeve me veprimtari të paligjshme si trafiku i drogës dhe pastrimi i parave. Të njëjtat argument u përsëritën edhe nga përfaqësuesit e presidentit në komision. Por pas sugjerimit të relatorit Anastas Angjeli për domosdoshmërinë e ligjit komisioni vendosi që të rrëzojë dekretin e presidentit. Tani ligji do të rishkojë sërish në seancë plenare ku pritet miratimi I tij nga ana e shumicës qeverisëse.