Një ditë pas arrestimit të Moisi Habilajt në Borsh, Policia e Vlorës ka dalë me një njoftim zyrtar në lidhje me detajet e operacionit, duke bërë të ditur se 48-vjeçari u kap me qëllim ekstradimin drejt Italisë, ku është dënuar me mbi 12 vjet burg për pjesëmarrje në organizatë kriminale të armatosur me qëllim trafikimin e lëndëve narkotike. I shumëkërkuari Moisi Habilaj, i cilësuar si person me rrezikshmëri të lartë u lokalizua në një lokal në Borsh këtë të shtunë, gjatë operacionit të koduar ‘Metodat’, të zhvilluar nga Drejtoria Vendore e Policisë Vlorë në bashkëpunim me Drejtorinë e Forcës së Posaçme Operacionale. Moisi Habilaj është një nga emrat më të njohur të dosjes së trafikut të drogës mes Shqipërisë dhe Italisë. Autoritetet bëjnë me dije se ai është dënuar nga Gjykata e Katanias me 12 vjet, 2 muaj e 13 ditë burg për veprën penale “Pjesëmarrje në organizatë kriminale të armatosur me qëllim trafikimin e lëndëve narkotike”.