Kina ka publikuar planet për të zgjeruar në mënyrë drastike programin e saj eksperimental të modifikimit të motit me qëllim që të mbulojë një zonë prej 5.5 milionë kilometrash katrorë, që është 1.5 herë më e madhe se sipërfaqja totale e Indisë. Sipas një deklarate të këshillit shtetëror, Kina do të ketë një sistem të zhvilluar të modifikimit të motit deri në 2025 falë kërkimeve avangard dhe teknologjive të reja.Pesë vitet e ardhshme, zona totale e mbuluar nga shiu apo bora artificiale do të arrijnë në 5.5 milionë km katror ndërsa 580 mijë kilometra katror sipërfaqe do të jenë të mbuluara nga teknologjitë e ndalimit të breshërit. Në deklaratën e qeverisë kineze shtohej se programi do të ndihmonte me menaxhimin e katastrofave, prodhimin bujqësor, reagimet e emergjencës në pyje dhe zjarret si edhe në përballimin e temperaturave të larta të pazakonta apo thatësirave. Kina prej kohësh është përpjekur të kontrollojë motin me qëllim që të mbrojë zonat bujqësore dhe të garantojë qiej të hapur për evente të rëndësishme. Ajo mbolli re para lojërave olimpike të Pekinit në 2008 me qëllim që të reduktonte smogun dhe të evitonte shiun para nisjes së tyre. Edhe tubime të rëndësishme politike të mbajtura në kryeqytetin kinez, zakonisht shoqërohen me qiej të pastër e të bukur, kjo falë modifikimit të motit dhe mbylljes së fabrikave të afërta. Si koncept, mbjellja e reve ekziston prej dekadash.