Agjencia Evropiane e Barnave ka miratuar vaksinën anti covid të Modernës për të vaksinuar fëmijët nga mosha 12 deri në 17 vjeç. Deri më tani, vaksina e Pfizer/BioNTech ka qenë opsioni i vetëm për vaksinim të fëmijëve në Amerikën Veriore dhe në Evropë. Vaksina e modernës, e prodhuar në SHBA, kërkon dy doza në distancë kohore prej katër javësh mes tyre. Komisioni evropian, po synon të zgjerojë vaksinimin me Modernën edhe tek të rinjtë tani, bazuar në rekomandimin e EMA-s. Por lëvizja ka edhe kritikët e saj pasi shkalla e vaksinimit në pjesën më të madhe të azisë dhe në afrikë, ku me miliona të rritur rrezikojnë sëmundjen e rëndë ose vdekjen nga covidi, është shumë më e ulët se në BE ku më shumë se gjysma e të rriturve tani janë vaksinuar plotësisht. Agjencia e Barnave në SHBA (FDA) momentalisht është duke shqyrtuar nëse do të zgjerojë përdorimin e vaksinës Moderna për fëmijët nën moshën 18 vjeçare. Derisa furnizimi me vaksina nëpër botë mbetet i vogël, shumica e botës ende ka vështirësi në imunizimin e të rriturve. Rregullatorët e SHBA-së dhe në Evropë kanë bërë thirrje për kujdes pasi të dy vaksinat (Moderna dhe Pfizer) lidhen me një reagim ekstremisht të rrallë te adoleshentët dhe të rinjtë, që është dhimbje e gjoksit dhe inflamacion i zemrës.