Berlini është skeptik për politikën e ndjekur nga Bashkimit Europian për migracionin, por modeli i Shqipërisë dhe precedenti që vendos për trajtimin e procedurave të azilit jashtë kufijve të unionit po ngjall interes për politikën gjermane. Kështu konfirmojnë burime të brendshme të Euractiv. Edhe Britania ka shfaqur interes për këtë rrugëzgjidhje. Modeli italo-shqiptar mund të ngrihet në diskutim në Bruksel, si një masë parandaluese për kërkesat për azil. Pas presionit nga opozita, qeveria po shqyrton aktualisht opsionet se si Gjermania mund të zbatojë procedura të tilla të jashtme të azilit. Një zëdhënës i ministrisë së brendshme la të kuptohet se kjo mund të përfshijë një zgjidhje të përbashkët europiane: "Qeveria federale gjithashtu tenton të zhvillojë bisedime në nivel ndërkombëtar në këtë kontekst," i tha ai Euractiv.